കോതമംഗലം: തലക്കോട് ഇഞ്ചിപ്പാറ ചെക്ക് പോസ്റ്റിന് സമീപം നിയന്ത്രണം വിട്ട ബസ് മറിഞ്ഞു. ബുധനാഴ്ച രാവിലെ ഇഞ്ചിപ്പാറ ചെക്ക് പോസ്റ്റിന് സമീപം വെച്ചാണ് അപകടമുണ്ടായത്. വെള്ളക്കയത്തുനിന്ന് കോതമംഗലത്തേക്ക് വരികയായിരുന്ന സ്വകാര്യ ബസാണ് അപകടത്തിൽപെട്ടത്.
ഡ്രൈവറുടെ സീറ്റിനടിയിൽ വെച്ചിരുന്ന വസ്തു നിരങ്ങി നീങ്ങി ബ്രേക്ക് പെഡലിനടിയിൽ കുടുങ്ങിയതാണ് നിയന്ത്രണം നഷ്ടപ്പെടാൻ കാരണമായത്. മുൻഭാഗം മണ്ണിൽ കുത്തി റോഡിനു വലതു വശത്തെ ചരുവിലേക്ക് ചെരിഞ്ഞ് മരത്തിൽ തങ്ങി നിൽക്കുകയായിരുന്നു. കൂടുതൽ താഴ്ചയിലേക്ക് മറിയാതിരുന്നതിനാൽ വലിയ ദുരന്തം ആണ് ഒഴിവായത്. ജീവനക്കാരെ കൂടാതെ ആറ് യാത്രക്കാരാണ് ബസിലുണ്ടായിരുന്നത്. ആർക്കും കാര്യമായ പരിക്കുകളില്ല.
