ലോറിക്ക് അടിയിൽപെട്ട സ്കൂട്ടർ യാത്രിക അത്ഭുതകരമായി രക്ഷപ്പെട്ടു

കാ​ക്ക​നാ​ട്: ക​ണ്ടെ​യ്ന​ർ ലോ​റി​ക്ക​ടി​യി​ൽ​പെ​ട്ട സ്കൂ​ട്ട​ർ യാ​ത്രി​ക അ​ത്ഭു​ത​ക​ര​മാ​യി ര​ക്ഷ​പ്പെ​ട്ടു. തി​ങ്ക​ളാ​ഴ്ച രാ​വി​ലെ 10നാ​യി​രു​ന്നു സം​ഭ​വം. കാ​ക്ക​നാ​ട് ടി.​വി സെ​ന്‍റ​റി​നു​സ​മീ​പം സീ​പോ​ർ​ട്ട് എ​യ​ർ​പോ​ർ​ട്ട് റോ​ഡി​ൽ​നി​ന്ന്​ തു​തി​യൂ​ർ ഭാ​ഗ​ത്തേ​ക്ക് തി​രി​യു​ന്ന ഈ​ച്ച​മു​ക്ക് ജ​ങ്​​ഷ​നി​ലാ​ണ്​ സം​ഭ​വം. കാ​ക്ക​നാ​ട് സെ​സി​ലെ എ​സ്.​ബി.​ഐ ജീ​വ​ന​ക്കാ​രി​യാ​ണ് അ​പ​ക​ട​ത്തി​ൽ​പെ​ട്ട​ത്.

ജ​ങ്ഷ​നി​ലെ രൂ​ക്ഷ​മാ​യ ഗ​താ​ഗ​ത​ക്കു​രു​ക്കി​ൽ​പെ​ട്ട യു​വ​തി ഇ​രു​ച​ക്ര വാ​ഹ​ന​വു​മാ​യി യു ​ടേ​ൺ എ​ടു​ക്കാ​ൻ സീ​പോ​ർ​ട്ട് എ​യ​ർ​പോ​ർ​ട്ട് റോ​ഡി​ലേ​ക്ക് ക​യ​റാ​ൻ കാ​ത്തു​നി​ൽ​ക്കു​ക​യാ​യി​രു​ന്നു. ഇതേസ​മ​യം, തൃ​പ്പൂ​ണി​ത്തു​റ ഭാ​ഗ​ത്തു​നി​ന്ന് എ​ത്തി​യ ക​ണ്ടെ​യ്ന​ർ കാ​ക്ക​നാ​ട് ഭാ​ഗ​ത്തേ​ക്ക് പോ​കാ​ൻ കാ​ത്തു​നി​ൽ​ക്കു​കയായിരുന്നു.

യു​വ​തി​യു​ടെ ഇ​രു​ച​ക്ര വാ​ഹ​ന​വും ക​ണ്ടെ​യ്നറും ​ഒ​രേ​സ​മ​യം മു​ന്നോ​ട്ട് എ​ടു​ത്ത​പ്പോ​ൾ ഇ​രു​ച​ക്ര​വാ​ഹ​നം ക​ണ്ടെ​യ്ന​റി​ന്‍റെ അ​ടി​യി​ൽ​പെടുകയായിരുന്നു​. ക​ണ്ടെ​യ്ന​ർ ഇ​ടി​ച്ച​യു​ട​ൻ ഇ​രു​ച​ക്ര വാ​ഹ​ന​ത്തി​ൽ​നി​ന്ന്​ ചാ​ടി​യ​തു​മൂ​ലമാണ്​ യുവതി രക്ഷപ്പെട്ടത്​.