കാക്കനാട് ശ്മശാനത്തിൽ സെമിത്തേരിക്ക് അനുമതി​

തൃക്കാക്കര: തൃക്കാക്കര നഗരസഭയുടെ പൊതുശ്മശാനത്തിലെ മൂന്നു സെന്റ് ഭൂമിയിൽ സെമിത്തേരി പണിയാൻ ഇന്നലെ ചേർന്ന നഗരസഭയുടെ അടിയന്തര കൗൺസിൽ യോഗം തീരുമാനിച്ചു. അത്താണി സെന്റ് ആന്റണീസ് റോമൻ കത്തോലിക്കാ പള്ളി വികാരി ഫാ.റോബിൻസണിന്റെ അപേക്ഷയുടെ അടിസ്ഥാനത്തിലായിരുന്നു കൗൺസിൽ യോഗം.

കഴിഞ്ഞ നവംബറിൽ ഇതേ പള്ളിയുടെ അപേക്ഷ പ്രകാരം പൊതുകല്ലറ പണിയാനും ആർക്ക് വേണമെങ്കിലും മൃതദേഹം അടക്കം ചെയ്യാൻ അനുവദിക്കാനും ഇതിന് ഫീസ് ഈടാക്കാനും തീരുമാനിച്ചിരുന്നതാണ്. മുമ്പ് തീരുമാനമെടുത്ത വി​ഷയത്തി​ൽ അടി​യന്തരമായി​ വീണ്ടും യോഗം വി​ളി​ക്കാനുള്ള സാഹചര്യം എന്താണെന്ന് പ്രതി​പക്ഷ നേതാവ് എം.കെ. ചന്ദ്രബാബു ചോദി​ച്ചെങ്കി​ലും തൃപ്തി​കരമായ മറുപടി​ നൽകാൻ ചെയർപേഴ്സൺ ​ രാധാമണി​ പി​ള്ളയ്ക്ക് സാധി​ച്ചി​ല്ല. ഒരു സമുദായത്തി​ന് മാത്രമായി​ പൊതുശ്മശാനത്തി​ലെ സ്ഥലം അനുവദി​ക്കാനാവി​ല്ലെന്നും കല്ലറ ഫീസ് നൽകി​ ആർക്കും ഉപയോഗി​ക്കാമെന്നും അവർ വ്യക്തമാക്കി​. തി​രക്കുപിടി​ച്ച് ഇത്തരം തീരുമാനമെടുക്കുന്നത് ശരി​യല്ലെന്നും നി​യമവി​രുദ്ധമായ കാര്യങ്ങൾ തീരുമാനി​ക്കരുതെന്നും സ്വതന്ത്ര അംഗമായ പി​.സി​. മനൂപും യോഗത്തി​ൽ പറഞ്ഞു.

തി​രഞ്ഞെടുപ്പി​ന്റെ പശ്ചാത്തലത്തി​ൽ ജി​ല്ലാ കോൺഗ്രസ് നേതൃത്വമാണ് സെമി​ത്തേരി​ അനുവദി​ക്കാൻ ഭരണസമി​തി​യി​ൽ നി​ർബന്ധം ചെലുത്തി​യത്. മൂന്നു മാസം മുമ്പ് പൊതുകല്ലറ പണി​യാമെന്ന് തീരുമാനി​ച്ചി​ട്ടും ഇവി​ടെ മതപരമായ ചടങ്ങുകൾ നടത്താനും കുരി​ശ് സ്ഥാപി​ക്കാനും കൂടി​ അനുവാദം നൽകണമെന്ന ലക്ഷ്യത്തോടെയാണ് ഇന്നലെ വീണ്ടും അടി​യന്തര യോഗം വി​ളി​ച്ചത്. ആദ്യതീരുമാനം തന്നെയാണ് യോഗത്തി​ൽ ആവർത്തി​ച്ചതെങ്കി​ലും മി​നി​ട്ട്സി​ൽ മതചടങ്ങുകൾക്ക് കൂടി​ അനുമതി​ എഴുതി​ ചേർത്തി​ട്ടുണ്ട്.

തൃക്കാക്കരയി​ലെ കോൺ​ഗ്രസ് നേതാക്കളെ ചൊവ്വാഴ്ച​ ഡി.സി.സി ഓഫീസിൽ വി​ളി​ച്ചുവരുത്തി ഇക്കാര്യത്തി​ൽ അന്ത്യശാസനം നൽകി​യി​രുന്നു.